Дуламсүрэнгийн дурдатгал

“1985  - 2011” оны хооронд ажиллаж байсан үеийн дурсамж

• 1985 оны намар би Сүхбаатарын нэрэмжит “Намын дээд сургууль” - н эдийн засгийн тэнхимд туслах ажилтнаар орж билээ. Тэр үед захирлаар Г.Миеэгомбо гуай, санхүү аж ахуй эрхэлсэн проректор Б.Даш-Ёндон гуай, санхүү аж ахуй эрхэлсэн захирал Чойжилжав, хичээлийн эрхлэгч Б.Эрдэнэсүрэн багш нар байлаа.
• Манай сургууль аливаа боловсон хүчнийг сонгож авахдаа өндөр шалгуураар буюу олон шат дамжлагат гарын үсэг, зөвшөөрлөөр дамждаг байсан санагдана. Зургаан тэнхимтэй, зургаан бичээчтэй, цомхон бөгөөд чадварлаг хамт олон байв. Манай Политэкономын тэнхимийн эрхлэгч доцент Ү.Чимэд, доцент Б.Намсрай, Ж.Ядамсүрэн, Ш.Батцэнгэл, залуу багш С.Энхбаатар, С.Жаргалсайхан гэх мэт шижигнэсэн сайхан залуус байв.1986 оны намар философийн тэнхимд ЗХУ - д сургууль төгссөн Ц.Баатартогтох, Г.Чулуунбат, шинэхэн хандидат Д.Цэдэв нар ирж ажиллаж байсан. Мөн 1988 оны өвөл Даваадоржийн Ганболд гэх ЗХУ - д эрдмийн зэрэг хамгаалсан мундаг хандидат манай тэнхимд ирж билээ. Философийн тэнхим манай тэнхимтэй зэрэгцээ байдаг ба Чимэд багш болон Гомбосүрэн багш нар их сайн найзууд, гэр нь ч ойрхон тул хоёул улс төр, цаг үе нийгмийн асуудлаар маргана, мэтгэлцэнэ, санаа бодлоо хуваалцана. Мөн тэр үед аймаг сумдын дарга нар манай сургууль дээр сургалтын журмаар ирж ур чадвараа дээшлүүлдэг байв. Тэр сургалтад Дамдин сайд тэргүүтэй газрын дарга нар лекц уншина. Үүнд: Тухайн салбарт тулгамдаж буй асуудал, гарч буй бэрхшээл, олсон ололт амжилтууд болон тоо баримтуудыг орон нутгийн дарга нарт танилцуулж дүн шинжилгээ хийдэг байв. Тухайн үеийн сонсогч нар цагийг маш сайн барьж хичээлд оролдог байсан ба сонсогч нарын ирцийг бүртгэж диспетчерт өгч тасалсан сонсогч нарын хичээл нөхөлт хоцрогдол зэрэгт тусгай анхаардаг буюу маш өндөр зохион байгуулалттай байв. Багш ажилтан бүр маш өндөр хариуцлагатай, аливаа ажлыг бүрэн гүйцэт өндөр бүтээмжтэй хийдэг байсан ба миний хувьд хэвлэлийн эх бэлдэх, багш нарын лекцүүдийг орос хэл дээр бичих, Диссертаци, Автореферат зэргийг ёстой машиндах шиг л болдог байв. Аав минь өөрөө мөн их сургуулийн багш сэхээтэн хүн байсан ч манай сургуулийг дан мундаг хүмүүсээс бүрдсэн сайхан газар хэмээн маш их хүндэлдэг байлаа.
• Сургууль маань шеф нэгдэлтэй, ногооны талбайтай, эмийн сантай, цэцэрлэг яслитай, ажилтнуудын орон сууцтай байсан ба нийт ажилтнуудын аж амьдрал, хүндрэл бэрхшээлд тусгайлан анхаардаг байв. Би ажиллах хугацаандаа Богдын өндөрт 3 жил, Найман айлын байранд 16 жил, Оюутны дотуур байранд 6 жил амьдарчээ.
• Миний үед лаборант байсан Балжинням, Тоожав, Наранчимэг, номын санч Оюунчимэг, Сумъяа, Н.Лхагвасүрэн, бичээч Оюунхүү, Баянжаргал, Сэржмядаг мөн аж ахуйн дарга Дондов, нярав Хорлоо, байрны коминда Сүхээ, аж ахуйн үйлчилгээний ажилтан Цэрэндаваа, Н.Энхтуяа, Н.Алтантуяа, Шуураа эгч, том Алтантуяа, Нарантуяа нартаа нэгэн цаг үед гар нийлж хамтран зүтгэж байсанд гүнээ талархаж төрөлх сургуулийнхаа 100 жилийн ойн баярын мэндийг хүргэе!

• 2024 оны 9-р сарын 09-ний өдөр
• Улаанбаатар хот С.Дуламсүрэн