“УДИРДЛАГЫН АКАДЕМИЙН ТҮҮХ” ЦАХИМ САНГИЙН ТУХАЙ

Түүхэн баримт, гэрэл зургийн цомог нь нэг талаар холдож одсон цаг хугацааг эргэн сануулдаг дурсамж, нөгөө талаар аливаа улс орон, байгууллага, хамт олны тодорхой түүхэн цаг үе ямар хүмүүсийн оюун санаа, хүч хөдөлмөр, сэтгэл зүтгэлээр хэрхэн бүтээгдэж байсныг дүрс болон агуулгадаа шингээсэн ой санамж юм. Сэтгэл хөдлөм сайхан дурсамж урам зориг бадрааж бас зарим талаар хөнгөн гуниг дагуулах нь бий. Та бидний хамтдаа бүтээсэн бүхэн ийнхүү түүх хийгээд гэрэл зургийн хальсанд мөнхөрч, хойчийн олон сайхан дурсамжийг түүчээлэн алс ирээдүйд хөтлөх буй заа.

Төрийн албаны сургалтын тогтолцоо үүсэж хөгжсөний 100 жилийн ой тохиож буй энэ онд Удирдлагын академийн өнгөрснийг өнөөдөртэй холбосон арван арваныг ардаа үджээ. Тэрхүү цаг хугацааны урсгалд төрийн албан хаагчдыг сургаж хөгжүүлэх нэр төртэй бөгөөд хариуцлагатай үүргийг манай үе үеийн багш, ажилтнууд хамтын хүчээр хэрхэн туулсныг, улс орныхоо хөгжилд хэрхэн гар бие оролцож явсныг дүрс бичлэг, баримт, гэрэл зургийн хальсанд мөнхөрсөн тэдний ахуй байдал, хүсэл мөрөөдлөөр жигүүрлэсэн гэгээн дүр тодоос тод илтгэн харуулах болно.

Намын түр сургууль, Намын төв сургууль, Нам, Улсын төв сургууль, Намын Шинэ хүчний дээд сургууль, Намын дээд сургууль, Эдийн засгийн дээд сургууль, Сэргээн байгуулагдсан Намын дээд сургууль, Улс төрийн дээд сургууль, Төр, нийгмийн судлалын академи, Төрийн захиргаа, удирдлагын хөгжлийн институтээс Удирдлагын академи хүртэлх бахдам сайхан түүхийг энэхүү цахим хуудсаар цахимжуулан хүргэж байна.

Төрийн албан хаагчдыг сургаж хөгжүүлэх ариун үйлсэд хамтран зүтгэж байгаа эрхэм хүндэт багш, ажилтнууд Та бидний бахархам сайхан дурсамж ирээдүйд ч түүхийн шаргал хуудсанд тодоос тод мөрөө үлдээсээр байх болно гэдэгт итгэл төгс байна.